Nahi Jeena Bin Tere

Najaane kya dhundta hu main

Mujhe khudko nahi hai pata

Kuch kehna chahta hu main

Par kyu saare alfaaz hai lapata

Yeh waqt yeh hawa yeh khushboo

Mujhe yaad teri dilaati hai

Tum, main, sab to hai ek sapna

Jo toot jaaye to sabko rulaati hai

Pal bhar mein tu tham si gayi

Jaise meri saanse ruk si gayi

Fir yeh ehsaas hua mujhe ki main to kuch bhi nahi

Sirf teri parchaayi hoon

Jise tujhse judaa rehna hai

Mere zindagi ki hakeekat hai yehi

Isiliye shaayad darta hu sone se

Ki kahi agar neend lag jaaye to subah hogi

Aur roshnee tujhe mujhse door kar jayegi

Isi khwaaish mein jaagta rehta hu

Ki tu aaye aur yeh parchaayi sach ban jaaye

Nahi jeena bin tere yeh tay kar liya hai

Fir chahe maut ki kyu na mil jaaye!

Main thak chuka hu

Ek din bheed mein chalte chalte achanak yeh mehsus hua ki main bhi bheed ka ek hissa ban chuka hu. Bachpan mein jo lagta tha ki main dusro se alag hu, main zindagi mein kuch alag karke dikhaunga, aaj sab jhooth lagta hai. Aaj lagta hai ki main bhi un hazaaro laakhon logon ki hi tarah maamooli hu. Maine kuch bada kaam kiya nahi hai aur aisa lagta hai ki shayad kar bhi nahi paaunga. Kayi sapne tut ke choor ho gaye hai aur jo bache hai who aaj bhi adhoore hai. Aur najaane kyu mann mein kahi yeh darr hai ki yeh saare sapne kabhi poore nahi honge. Unko poori karne ki yeh jo bhaag daud hai who najaane kyu aaj bematlab si lag rahi hai. Thak chuka hu main sabko jawaab dete dete, thak chukka hu main sabko samjhate samjhate. Aur sabse jyada main apne aap ko samjhake thak gaya hu. Ab aur naahi himaat hai, naahi hausla hai, aur naahi taakat hai ki main iss duniya se ladhu, main apne aap se ladhu. Main thak chuka hu.